Акафист святой равноапостольной Марии Магдалине и святителю Николаю чудотворцу

Текст акафиста утвержден на заседании Священного Синода 25 августа 2022 года (журнал № 78).

Кондак 1

Избра́нная Го́сподем к равноапо́стольному служе́нию, свята́я Мари́е Магдали́но, возлю́бленному ти Христу́ после́довала еси́; те́мже пе́сньми с любо́вию восхваля́ем тя: ты же, я́ко иму́щая дерзнове́ние ве́лие ко Го́споду, от вся́ких нас бед моли́твами твои́ми изба́ви, да с ра́достию зове́м ти: Ра́дуйся, свята́я Мари́е Магдали́но, Сладча́йшаго Го́спода Иису́са возлюби́вшая.

Икос 1

А́нгелов Творе́ц и Госпо́дь сил, предуве́девый благо́е произволе́ние твое́, свята́я мироно́сице, от гра́да Магдалы́ избра́ тя, свободи́в от диа́вольския се́ти; ты же по сих ве́рная служи́тельница Го́сподеви яви́лася еси́, ревну́ющи о прославле́нии Его́ житие́м и служе́нием. Мы же, чудя́щеся таково́му о тебе́ Бо́жию смотре́нию, во умиле́нии серде́ц зове́м ти:

Ра́дуйся, Сы́ном Бо́жиим из тьмы диа́вольския в чу́дный свет Его́ призва́нная;

ра́дуйся, ми́ру всему́ провозве́стницею си́лы Бо́жия я́вльшаяся.

Ра́дуйся, душе́ю твое́ю благода́тно обнови́вшаяся;

ра́дуйся, си́лу вра́жию до́бре победи́вшая.

Ра́дуйся, благода́тию Христо́вою те́лом и ду́хом до конца́ чи́ста пребы́вшая.

ра́дуйся, с чистото́ю се́рдца и нищету́ духо́вную до конца́ сохрани́вшая.

Ра́дуйся, кре́пкою ве́рою и те́плою любо́вию ко Христу́ Бо́гу просия́вшая;

ра́дуйся, ве́рно Тому́ да́же до сме́рти послужи́вшая.

Ра́дуйся, пе́рвее всех воскре́сшаго Христа́ узре́ти сподо́бившаяся;

ра́дуйся, а́нгельскою бе́седою почте́нная.

Ра́дуйся, про́поведь Ева́нгелия в сокро́вище се́рдца своего́ вмести́вшая;

ра́дуйся, про́поведь Воскресе́ния Апо́столом возвести́вшая.

Ра́дуйся, свята́я Мари́е Магдали́но, Сладча́йшаго Го́спода Иису́са возлюби́вшая.

Кондак 2

Ви́дящи свята́я Мари́я себе́ от седми́ лю́тых бесо́в изба́влену, всем се́рдцем Победи́телю а́да Христу́ Бо́гу прилепи́ся, вся лю́ди науча́ющи не усты́ то́кмо, но и всем житие́м Бо́гу служи́ти, вопию́щи Тому́: Аллилу́иа.

Икос 2

Ра́зум челове́ческий недоумева́ет, помышля́я, из каковы́я беды́ на высоту́ ангелоподо́бнаго жития́ благода́тию Христо́вою возшла́ еси́, достохва́льная Мари́е Магдали́но. Те́мже и мы, до́брую тя предста́тельницу иму́ще, мо́лимся тебе́ те́пле: изба́ви и нас от бе́здны грехо́вныя, да любо́вию вопие́м ти такова́я:

Ра́дуйся, лю́таго де́монскаго ра́бства избе́гшая;

ра́дуйся, лесть лука́вых бесо́в я́ве обличи́вшая.

Ра́дуйся, в напа́сти вра́жией ко Христу́ Бо́гу прибега́ти всех научи́вшая;

ра́дуйся, грехми́ обремене́нныя не отча́яватися побужда́ющая.

Ра́дуйся, ко свя́тости всем гре́шником путь показа́вшая;

ра́дуйся, всемо́щную си́лу благо́дати Христо́вы позна́вшая.

Ра́дуйся, досто́йнаго Бо́гу благодаре́ния до́брая наста́внице;

ра́дуйся, и́стиннаго богохвале́ния ве́рная учи́тельнице.

Ра́дуйся, в житии́ твое́м пра́вый путь земна́го тече́ния нам показа́вшая;

ра́дуйся, ду́ши на́ша от ле́сти сатани́нския защища́ющая.

Ра́дуйся, всем гре́шником пред Бо́гом блага́я засту́пнице;

ра́дуйся, во вся́кой ско́рби те́плая ко Христу́ на́ша хода́таице.

Ра́дуйся, свята́я Мари́е Магдали́но, Сладча́йшаго Го́спода Иису́са возлюби́вшая.

Кондак 3

Си́лою боже́ственныя благода́ти, ку́пно же и свои́м благи́м произволе́нием, оста́вила еси́ дом отца́ твоего́, я́коже дре́вле Авраа́м, и ра́достно после́довала еси́ Христу́ Бо́гу; те́мже мо́лим тя, учени́це Христо́ва, сла́вная Мари́е, моли́твами твои́ми и на́ша сердца́ просвети́ любо́вию к Бо́гу, да и ны́не и при́сно взыва́ем Тому́: Аллилу́иа.

Икос 3

Иму́щи богодарова́нную ти прему́дрости си́лу, му́жески отве́ргла еси́, Мари́е Магдали́но, кра́сная сего́ ми́ра и, я́ко учени́ца до́брая, премно́гим милосе́рдием обнища́вшему за ны Сло́ву и́стинно послужи́ла еси́. Сего́ ра́ди и мы со умиле́нием глаго́лем ти:

Ра́дуйся, до́брая Христо́ва учени́це;

ра́дуйся, и́стинныя любве́ к Бо́гу наста́внице.

Ра́дуйся, суету́ ми́ра сего́ до́бре позна́вшая;

ра́дуйся, собла́зны его́ му́жески отве́ргшая.

Ра́дуйся, кра́сная ми́ра сего́ ни во что́же вмени́вшая;

ра́дуйся, тем блаже́нства ве́чнаго дости́гшая.

Ра́дуйся, для дел милосе́рдия из до́му земна́го изше́дшая;

ра́дуйся, Христо́во милосе́рдие зде и на небеси́ обре́тшая.

Ра́дуйся, чи́ну и́ноческому до́брый путь жития́ предпоказа́вшая;

ра́дуйся, всех ко Христу́ Бо́гу путево́дствующая.

Ра́дуйся, му́драя а́гнице, от злых во́лков к до́брому па́стырю Христу́ прибе́гшая;

ра́дуйся, во двор слове́сных ове́ц Его́ вше́дшая.

Ра́дуйся, свята́я Мари́е Магдали́но, Сладча́йшаго Го́спода Иису́са возлюби́вшая.

Кондак 4

Бу́ря бесо́вския я́рости превели́кою си́лою устреми́ся на храм души́ твоея́, свята́я Мари́е, но того́ испрове́ргнути не возмо́же: обрела́ бо еси́ спасе́ние на тве́рдем ве́ры Христо́вы ка́мени, на не́мже ты, му́драя же́но, недви́жимо стоя́щи, учи́ши всех Всеблаго́му Бо́гу воспева́ти песнь: Аллилу́иа.

Икос 4

Слы́шаще, богому́драя Мари́е, я́ко в после́довании Христу́ обрела́ еси́ и́стинное весе́лие се́рдца, пра́вду, мир и ра́дость о Ду́се Свя́те, тщи́мся и мы яви́тися в ли́це прича́стник Ца́рства Бо́жия. Тебе́ же, я́ко прича́стнице того́ су́щей и путь нам к нему́ показа́вшей, рцем вси такова́я:

Ра́дуйся, небе́сную Иису́сову сла́дость позна́вшая;

ра́дуйся, ра́йския сне́ди непреста́нно вкуша́ющая.

Ра́дуйся, жизнь и́стинную во Христе́ обре́тшая;

ра́дуйся, то́яжде о́браз и нам ве́рно показа́вшая.

Ра́дуйся, огнь любве́ к Бо́гу в се́рдце твое́м возже́гшая;

ра́дуйся, в ра́дости небе́сней ны́не при́сно живу́щая.

Ра́дуйся, Христо́м Бо́гом возлю́бленная;

ра́дуйся, Ду́ха Свята́го пречестно́е жили́ще.

Ра́дуйся, в беда́х на́ших помо́щнице;

ра́дуйся, приле́жная о нас к Бо́гу моли́твеннице.

Ра́дуйся, Бо́га Сло́ва всеусе́рдная учени́це;

ра́дуйся, на́ша блага́я и кро́ткая учи́тельнице.

Ра́дуйся, свята́я Мари́е Магдали́но, Сладча́йшаго Го́спода Иису́са возлюби́вшая.

Кондак 5

Боготе́чная звезда́, спу́тствующи Христу́, сла́вная Мари́е, посреде́ мироно́сиц яви́лася еси́. С ни́миже ны́не вы́ну предстоя́щи Святе́й Тро́ице, и нас моли́твами твои́ми к свяще́нному тех ли́ку совокупи́, путь те́мный жития́ на́шего све́том твои́м озаря́ющи, да ра́достно возопие́м Бо́гу: Аллилу́иа.

Икос 5

Ви́дящи, свята́я Мари́е, Христа́ Бо́га на Кресте́ ви́сяща, ди́вное му́жество показа́ла еси́: мно́зи бо от учени́к Учи́теля своего́ оста́виша; ты же, непреста́нными Боже́ственными уче́ньми ду́шу и мысль разже́гши, не́мощь естества́ же́нскаго превозмогла́ еси́ и та́ко причасти́лася еси́ спаси́тельней Хри́стовой стра́сти. Сего́ ра́ди мы, сице́вое твое́ до́блественное му́жество зря́ще, прино́сим ти похвалы́:

Ра́дуйся, Христу́ Бо́гу, на Кресте́ ви́сящу, сострада́вшая;

ра́дуйся, явле́нием Его́ по Воскресе́нии обра́дованная.

Ра́дуйся, непоколеби́мыя любве́ ко Христу́ нам путь показа́вшая;

ра́дуйся, сицево́ю любо́вию в предста́тельстве о нас к Бо́гу дерзнове́ние ве́лие обре́тшая.

Ра́дуйся, я́ко тебе́ та́йная прему́дрости Своея́ Бог яви́л есть;

ра́дуйся, я́ко тебе́ и́стинному богосло́вию Сам Бог Сло́во научи́л есть.

Ра́дуйся, жена́м добро́то и похвале́ние;

ра́дуйся, па́че си́льных муже́й крепча́йшая.

Ра́дуйся, му́дрых жен красото́ и удобре́ние;

ра́дуйся, мудрецо́в ми́ра сего́ мудре́йшая.

Ра́дуйся, от бесо́в стужа́емым кре́пкое прибе́жище;

ра́дуйся, христиа́н всех до́брое ра́дование.

Ра́дуйся, свята́я Мари́е Магдали́но, Сладча́йшаго Го́спода Иису́са возлюби́вшая.

Кондак 6

Благода́тию Твое́ю не́мощная врачу́еши и некре́пкия сосу́ды тве́рды соде́ловаеши, Христе́ Царю́: мироно́сицы бо жены́ у Креста́ Твоего́ му́жески предстоя́т и благода́ть кре́стную всем небоя́зненно возвеща́ют; ли́цы же му́дрых жен, лико́м А́нгельским уподо́битися тща́щеся, бо́дренно вы́ну взыва́ют Тро́ице Святе́й: Аллилу́иа.

Икос 6

Взыску́ющи озари́тися све́том и́стиннаго богоразу́мия, егда́ Бо́га на Кресте́ ви́сяща ви́дела еси́, глаго́лала еси́ слезя́щи, ди́вная Мари́е: «Ка́ко Жизнь смерть во́льную ны́не прие́млет?» Мы же, сла́вное просвеще́ние твое́ благода́тию Свята́го Ду́ха ве́дуще, пое́м ти сицева́я:

Ра́дуйся, Христа́ ра́спята от глубины́ души́ опла́кавшая;

ра́дуйся, весе́лие ве́чное в селе́ниих небе́сных обре́тшая.

Ра́дуйся, нам о́браз до́браго пла́ча показа́вшая.

ра́дуйся, я́ко ты еси́ на́ше непреста́нное ра́дование.

Ра́дуйся, я́ко Христо́вым Страсте́м на земли́ о́бщница явля́ешися;

ра́дуйся, я́ко с Ним о Нем на небеси́ прославля́ешися.

Ра́дуйся, враго́в безпло́тных кре́пкая победи́тельнице;

радуйся, и́стинная лозо́ виногра́да Христо́ва.

Ра́дуйся, всех скорбя́щих утеше́ние нело́жное;

ра́дуйся, во всех ско́рбех на́ших ско́рая помо́щнице.

Ра́дуйся, я́ко всем христиа́ном воспомина́ние твое́ пресла́дко;

ра́дуйся, я́ко всей Це́ркви Христо́вой и́мя твое́ прече́стно.

Ра́дуйся, свята́я Мари́е Магдали́но, Сладча́йшаго Го́спода Иису́са возлюби́вшая.

Кондак 7

Хотя́щи уразуме́ти Креста́ всепобеди́тельную си́лу, до конца́ Христо́вой Стра́сти предстоя́ла еси́ у Креста́ Спа́сова со ины́ми жена́ми, пресла́вная Мари́е, Ма́тери же Госпо́дни боле́зненно состра́ждущи, та́ко недоуме́нно вопия́ла еси́: «Что сие́ есть стра́нное чу́до? Содержа́й всю тварь пострада́ти изво́ли». Мы же на Живоно́сный Крест во́лею Возне́сшемуся любо́вию возглашае́м: Аллилу́иа.

Икос 7

Ди́вная жена́ яви́лася еси́, блаже́нная Мари́е, любо́вию твое́ю ко Христу́ Бо́гу: ту́ю бо го́рестными изъявля́я рыда́ньми, ко Сня́тому со Креста́ припа́дающи, слеза́ми пречи́стыя я́звы Его́ омы́ла еси. Еще́ же благообра́зному Ио́сифу и правдолюби́вому Никоди́му после́дующи, ко гро́бу Спа́сову со ины́ми святы́ми жена́ми текла́ еси́, о́во пла́чущи, о́во пла́чущую неуте́шно Ма́терь Его́ Пренепоро́чную, Е́йже ду́шу лю́тое ору́жие про́йде, утеша́ющи. Мы же, такову́ю твою́ до́блесть ве́дуще, смире́нно взыва́ем ти:

Ра́дуйся, пречи́стыя я́звы Христо́вы слеза́ми омы́вшая;

ра́дуйся, Ма́тери То́го Пренепоро́чней на Голго́фе состра́давшая.

Ра́дуйся, Христа́ да́же до гро́ба не оста́вившая;

ра́дуйся, во гроб полага́вшуюся Жизнь недоуме́нно зре́вшая.

Ра́дуйся, слеза́м покая́ния на́ша до́брая учи́тельнице;

ра́дуйся, те́ми слеза́ми грехо́вныя скве́рны омыва́ти нас наставля́ющая.

Ра́дуйся, те́ми же се́рдце на́ше окамене́нное умягча́ти побужда́ющая;

ра́дуйся, па́мятовати вы́ну Стра́сти Христо́вы нас науча́ющая.

Ра́дуйся, сла́вная Мари́е, ве́рная на́ша хода́таице;

ра́дуйся, до́брая слуго́ Христо́ва.

Ра́дуйся, Го́сподеви, а не челове́ком угожда́вшая;

ра́дуйся, о́браз и́стинныя му́дрости нам показа́вшая.

Ра́дуйся, свята́я Мари́е Магдали́но, Сладча́йшаго Го́спода Иису́са возлюби́вшая.

Кондак 8

Стра́нно, богому́драя Мари́е, яви́ся тебе́ погребе́ние всем жизнь подаю́щаго Жизнода́вца: Того́ любо́вию уязвля́ема, еще́ су́щей тьме, ко гро́бу Его́ принесла́ еси́ ми́ро и сле́зныя проли́ла еси́, я́ко арома́ты. Те́мже и пребыва́еши ны́не во благово́нных рая́ селе́ниих, со А́нгельскими ли́ки взыва́ющи вы́ну Бо́гу: Аллилу́иа.

Икос 8

Весь сла́дость, весь ра́дость, весь жизнь тебе́ бысть Иису́с, свята́я Мари́е: Того́ ра́ди, ви́девши ка́мень взят от гро́ба, Сего́ же не обре́тши, рыда́ющи текла́ еси́ к живо́му ве́ры ка́меню Си́мону и друго́му, его́же любля́ше Иису́с, ученику́, боле́зненно глаго́лющи и́ма: «Взя́ша Го́спода от гро́ба, и не вем, где положи́ша Его́». Ны́не же ты, свободи́вшися от ско́рби тоя́, со Христо́м ве́чно ра́дуешися на небеси́. Мы же земни́и в такову́ю ра́дость моли́твами твои́ми вни́ти ча́юще, со умиле́нием вопие́м ти та́ко:

Ра́дуйся, сия́нием любве́ твоея́ ко Христу́ тьму нощну́ю победи́вшая;

ра́дуйся, о на́шем поми́ловании Того́ усе́рдно прося́щая.

Ра́дуйся, нището́ю духо́вною Ца́рство Небе́сное стяжа́вшая;

ра́дуйся, све́том ве́чным на небеси́ осия́нная.

Ра́дуйся, я́ко по ско́рби о Страсте́х Христо́вых обрела́ еси́ оби́льное утеше́ние;

ра́дуйся, же́но кро́ткая, насле́днице земли́ небе́снаго рая́.

Ра́дуйся, алка́вшая и жа́ждавшая пра́вды Христо́вы, трапе́зы небе́сныя ны́не насыща́ющаяся;

ра́дуйся, ми́лостивая, ми́лость Влады́ки обре́тшая.

Ра́дуйся, ты бо ны́не, я́ко чи́стая се́рдцем, Бо́га лице́м к лицу́ зри́ши;

ра́дуйся, я́ко сподо́билася еси́ пе́рвее всех ви́дети Воскресе́ние Христа́, ве́чнаго Ми́ра.

Ра́дуйся, изгна́нная пра́вды ра́ди Христо́вы, я́ко твое́ есть Ца́рство Бо́жие;

ра́дуйся, приобре́тшая ве́чное весе́лие и мзду мно́гу на небесе́х.

Ра́дуйся, свята́я Мари́е Магдали́но, Сладча́йшаго Го́спода Иису́са возлюби́вшая.

Кондак 9

Всяк чин А́нгельский удиви́ся вели́кой та́йне сла́внаго Воскре́сения Твоего́, Христе́ Царю́, ад же притре́петен бысть, ви́дев, я́ко снизше́л еси́ в преиспо́дняя земли́ и сокруши́л еси́ вереи́ ве́чныя, содержа́щия свя́занныя, Христе́. Мы же ра́дости жен мироно́сиц сора́дующеся, с весе́лием глаго́лем Ти: Аллилу́иа.

Икос 9

Вети́й многовеща́нных язы́цы не довле́ют досто́йно изрещи́ вели́кую скорбь твою́, сла́вная Мари́е, егда́ стоя́ла еси́ вне гро́ба пла́чущи. Кто бо возмо́жет рещи́ боле́знь души́ твоея́, егда́ не обрела́ еси́ во гро́бе па́че жи́зни своея́ возлю́бленнаго ти Го́спода? Приско́рбное се́рдце твое́ не возмо́же внима́ти утеше́нию А́нгелов све́тлых. Сицеву́ю скорбь твою́ со умиле́нием воспомина́юще, воспева́ем ти такова́я:

Ра́дуйся, ви́дети Христа́ Иису́са в пеще́ру прини́кшая;

ра́дуйся, ны́не Того́ на Престо́ле сла́вы седя́ща зря́щая.

Ра́дуйся, преукраше́нный храм Ду́ха Всесвята́го я́вльшаяся;

ра́дуйся, све́тлых небожи́телей еще́ су́щи на земли́ узре́вшая.

Ра́дуйся, от тех глас ра́дости Воскресе́ния Христо́ва прии́мшая;

ра́дуйся, я́ко ты с ни́ми ны́не при́сно ра́дуешися.

Ра́дуйся, во благоуха́ющую ми́ра Христо́ва воню́ сла́дце прите́кшая;

ра́дуйся, любо́вию ми́ро Христу́ прине́сшая.

Ра́дуйся, отве́ргшая ра́достей ми́ра грехо́внаго го́речь;

ра́дуйся, от Ча́ши Христо́вы поче́рпшая сла́дость.

Ра́дуйся, до́брая ле́торасле са́да Иису́сова;

ра́дуйся, благопло́дная лозо́ вертогра́да Бо́жия.

Ра́дуйся, свята́я Мари́е Магдали́но, Сладча́йшаго Го́спода Иису́са возлюби́вшая.

Кондак 10

Спасти́ хотя́ мир, во гроб снизше́л еси́, Безсме́ртне, а́дову разруши́л еси́ си́лу и воскре́сл еси́, я́ко Победи́тель, Христе́ Боже́, жена́м мироно́сицам веща́вый: «Ра́дуйтеся». С ни́миже и мы ны́не песнь ра́дости прино́сим Ти: Аллилу́иа.

Икос 10

Стены́ ка́менныя тве́рдее бысть любо́вь твоя́ к возлю́бльшему тя Христу́, мироно́сице сла́вная Магдали́но Мари́е: те́мже ви́дела еси́ пре́жде ине́х Живота́ на́шего, из гро́ба возста́вша; вертогра́даря же Того́ непщева́ла еси́ бы́ти и вопия́ла еси́ Тому́, забы́вши естества́ не́мощь: «А́ще Ты еси́ взял Его́, пове́ждь ми, где еси́ положи́л Его́, и аз возму́ Его́», но сла́достный Того́ глас показа́ ти Учи́теля, нас же глаша́ти научи́ тебе́ си́це:

Ра́дуйся, и́стиннаго Вертогра́даря воскре́сша пе́рвее ине́х узре́вшая;

ра́дуйся, в вертогра́де небе́снем водвори́вшаяся.

Ра́дуйся, гро́здием Бо́жия благода́ти ны́не непреста́нно пита́ющаяся;

ра́дуйся, вино́м ра́йских ра́достей веселя́щаяся.

Ра́дуйся, я́ко твоя́ любо́вь к Бо́гу не́мощь естества́ победи́ла есть;

ра́дуйся, я́ко та́я и нас ре́вности Бо́жией научи́ла есть.

Ра́дуйся, из уст Христо́вых веща́ние Воскресе́ния пе́рвее прии́мшая;

ра́дуйся, Апо́столом глаго́лы ра́дости пе́рвее возвести́вшая.

Ра́дуйся, ве́чную ра́дость на небеси́ обре́тшая;

ра́дуйся, я́ко ты и нас к той ра́дости тобо́ю зове́ши.

Ра́дуйся, я́ко о сем о нас к Бо́гу непреста́нно хода́тайствуеши;

ра́дуйся, я́ко Тому́ моли́твы о нас те́пле прино́сиши.

Ра́дуйся, свята́я Мари́е Магдали́но, Сладча́йшаго Го́спода Иису́са возлюби́вшая.

Кондак 11

Ни еди́но же сло́во довле́ет воспе́ти по достоя́нию боже́ственную ра́дость Воскресе́ния Христо́ва, ю́же со ины́ми жена́ми, сла́вная Мари́е, Апо́столом возвести́ в сей нарече́нный и святы́й день, пра́здников пра́здник и торжество́ из торже́ств. Те́мже, пред вели́чием неизрече́нных щедро́т Твои́х, Христе́ Царю́, на нас бы́вших, преклоня́ющеся, со смире́нием и любо́вию зове́м Ти: Аллилу́иа.

Икос 11

Светоза́рная звезда́ грехо́вному ми́ру яви́лася еси́, Магдали́но Мари́е, егда́ по сла́внем Спа́сове вознесе́нии, гра́ды и ве́си преходя́щи и сло́во Ева́нгелия всю́ду возвеща́ющи, мно́ги подклони́ла еси́ под благо́е и́го Христо́во. Дости́гши же да́же до дре́вняго Ри́ма, му́жески Тиве́рию ке́сарю предста́ла еси́ и тому́ му́дрыми словесы́ живоно́сную си́лу Христа́ уя́снила еси́, лука́ваго же Пила́та и безбо́жнаго архиере́я обличи́ла еси́. Таково́му по́двигу апо́стольства твоего́ дивя́щеся, ра́достно вопие́м ти си́це:

Ра́дуйся, Христо́ва уче́ния сла́вная благовести́тельнице;

ра́дуйся, язы́ческия тьмы светоза́рная прогони́тельнице.

Ра́дуйся, гне́ва ке́сарева не убоя́вшаяся;

ра́дуйся, зло́бу и кова́рство враго́в Христо́вых тому́ показа́вшая.

Ра́дуйся, помраче́ние язы́ческое дерзнове́нно обличи́вшая;

ра́дуйся, грехо́вныя у́зы мно́гих челове́к разреши́вшая.

Ра́дуйся, за́поведи Христо́вы до́бре уразуме́вшая;

ра́дуйся, тем ве́рно после́довавшая.

Ра́дуйся, о́браз тве́рдаго стоя́ния за пра́вду Христо́ву нам показа́вшая;

ра́дуйся, Христо́вей му́дрости всех научи́вшая.

Ра́дуйся, мно́гия лю́ди из тьмы неве́дения в чу́дный Христа́ свет приве́дшая;

ра́дуйся, спасе́ние душ гре́шников па́че своея́ жи́зни возлюби́вшая.

Ра́дуйся, свята́я Мари́е Магдали́но, Сладча́йшаго Го́спода Иису́са возлюби́вшая.

Кондак 12

Благода́ти от Бо́га изоби́льно испо́лненная, мно́жество душ ко Христу́ привела́ еси́, сла́вная Мари́е: по сем же пришла́ еси́ во Ефе́с, иде́же апо́стольски любо́вию со Апо́столом любве́ спасе́нию челове́к послужи́вши, блаже́нным успе́нием ко Го́споду преста́вилася еси́, Ему́же ны́не с многочи́сленными небе́сными певцы́ непреста́нно пое́ши: Аллилу́иа.

Икос 12

Пою́ще твое́ достохва́льное житие́ на земли́ и сла́ву, я́же на небеси́, ра́достно сла́вим, пое́м и велича́ем ди́внаго во святы́х Свои́х Царя́ Небе́снаго: зане́ не то́кмо сама́ ты, свята́я Мари́е, Того́ благода́тию, в селе́ниих пра́ведных ны́не лику́еши, но и нас весели́ши на земли́, оста́вивши нам многоце́нныя мо́щи твоя́, я́же му́дрый Лев царь из Ефе́са в Константи́нь град пренести́ повеле́. Ты́я, источа́ющия благода́ть неоску́дную всем любо́вию притека́ющим, мы ве́рою и любо́вию лобыза́юще, уми́льно воспева́ем ти такова́я:

Ра́дуйся, на земли́ любо́вию ко Христу́ горе́вшая;

ра́дуйся, на небеси́ в ра́йския оби́тели Того́ всели́вшаяся.

Ра́дуйся, ве́рным тве́рдое заступле́ние;

ра́дуйся, исто́чник исцеле́ний неоску́дный.

Ра́дуйся, благово́нное ми́ро, Це́рковь благоуха́ющее;

ра́дуйся, сокро́вище Бо́жией благода́ти неиждива́емое.

Ра́дуйся, кади́льнице злата́я, фимиа́м моли́твы о нас к Бо́гу непреста́нно принося́щая;

ра́дуйся, я́ко ты и нам прия́ти ра́дость, благода́ть же и сла́ву непреста́нно хода́тайствуеши.

Ра́дуйся, А́нгельских лико́в ве́рная соуча́стнице;

ра́дуйся, небе́сных черто́гов сла́вная жи́тельнице.

Ра́дуйся, я́ко мзда твоя́ мно́га есть на небесе́х;

ра́дуйся, я́ко ра́дость твоя́ ве́чна есть во оби́телех святы́х.

Ра́дуйся, свята́я Мари́е Магдали́но, Сладча́йшаго Го́спода Иису́са возлюби́вшая.

Кондак 13

О пречу́дное и преди́вное жен украше́ние, всем же христиа́ном похвала́ и ра́дование, Апо́столом ра́вная я́вльшаяся, мироно́сице сла́вная Магдали́но Мари́е! Ны́нешнее на́ше моле́ние прие́мши, от вся́ких нас бед и ско́рбей душе́вных и теле́сных и от враг ви́димых и неви́димых, на нас находя́щих, изба́ви и к Ца́рствию Небе́сному хода́тайством твои́м напра́ви всех, со умиле́нием и любо́вию пою́щих о тебе́ Бо́гу: Аллилу́иа.

[Се́й конда́к глаго́лется три́жды.]
[Далее повторяем 1‑е икос и кондак:]

Икос 1

А́нгелов Творе́ц и Госпо́дь сил, предуве́девый благо́е произволе́ние твое́, свята́я мироно́сице, от гра́да Магдалы́ избра́ тя, свободи́в от диа́вольския се́ти; ты же по сих ве́рная служи́тельница Го́сподеви яви́лася еси́, ревну́ющи о прославле́нии Его́ житие́м и служе́нием. Мы же, чудя́щеся таково́му о тебе́ Бо́жию смотре́нию, во умиле́нии серде́ц зове́м ти:

Ра́дуйся, Сы́ном Бо́жиим из тьмы диа́вольския в чу́дный свет Его́ призва́нная;

ра́дуйся, ми́ру всему́ провозве́стницею си́лы Бо́жия я́вльшаяся.

Ра́дуйся, душе́ю твое́ю благода́тно обнови́вшаяся;

ра́дуйся, си́лу вра́жию до́бре победи́вшая.

Ра́дуйся, благода́тию Христо́вою те́лом и ду́хом до конца́ чи́ста пребы́вшая.

ра́дуйся, с чистото́ю се́рдца и нищету́ духо́вную до конца́ сохрани́вшая.

Ра́дуйся, кре́пкою ве́рою и те́плою любо́вию ко Христу́ Бо́гу просия́вшая;

ра́дуйся, ве́рно Тому́ да́же до сме́рти послужи́вшая.

Ра́дуйся, пе́рвее всех воскре́сшаго Христа́ узре́ти сподо́бившаяся;

ра́дуйся, а́нгельскою бе́седою почте́нная.

Ра́дуйся, про́поведь Ева́нгелия в сокро́вище се́рдца своего́ вмести́вшая;

ра́дуйся, про́поведь Воскресе́ния Апо́столом возвести́вшая.

Ра́дуйся, свята́я Мари́е Магдали́но, Сладча́йшаго Го́спода Иису́са возлюби́вшая.

Кондак 1

Избра́нная Го́сподем к равноапо́стольному служе́нию, свята́я Мари́е Магдали́но, возлю́бленному ти Христу́ после́довала еси́; те́мже пе́сньми с любо́вию восхваля́ем тя: ты же, я́ко иму́щая дерзнове́ние ве́лие ко Го́споду, от вся́ких нас бед моли́твами твои́ми изба́ви, да с ра́достию зове́м ти: Ра́дуйся, свята́я Мари́е Магдали́но, Сладча́йшаго Го́спода Иису́са возлюби́вшая.

Молитва

О свята́я мироно́сице и всехва́льная равноапо́стольная Христо́ва учени́це Магдали́но Мари́е! К тебе́, я́ко ве́рней и мо́щней о нас пред Бо́гом хода́таице, гре́шнии и недосто́йнии ны́не усе́рдно прибега́ем и в сокруше́нии серде́ц на́ших мо́лимся. Ты в житии́ свое́м стра́шныя ко́зни бесо́вския испыта́ла еси́, но благода́тию Христо́вою я́вно тех свободи́лася еси́; и нас моли́твами твои́ми от се́ти бесо́вския изба́ви, да всегда́ во всем житии́ на́шем де́лом, сло́вом, мы́слию и та́йными помышле́ниями серде́ц на́ших ве́рно послу́жим Еди́ному Свято́му Влады́це Бо́гу, я́коже Тому́ обеща́лися есмы́. Ты па́че всех благ земны́х Сладча́йшаго Го́спода Иису́са возлюби́ла еси́ и Тому́ чрез все житие́ до́бре после́довала еси́, Боже́ственными уче́нии Его́ и благода́тию не то́кмо свою́ ду́шу пита́ющи, но и мно́жество люде́й от тьмы язы́ческия ко Христа́ чу́дному све́ту приводя́щи. Сия́ у́бо ве́дуще про́сим тя: испроси́ нам у Христа́ Бо́га благода́ть просвеща́ющую и освяща́ющую, да, е́ю осеня́еми, в ве́ре и благоче́стии, в по́двизех любве́ и самоотверже́ния преуспева́ти бу́дем, да неле́ностно тщи́мся служи́ти бли́жним в их ну́ждех духо́вных и теле́сных, твоего́ человеколю́бия о́браз па́мятующе. Ты, свята́я Мари́е, бо́дренно благода́тию Бо́жиею житие́ на земли́ прете́кши, во оби́тели небе́сныя ра́дуяся отшла́ еси́; моли́ у́бо Христа́ Спа́са, да моли́твами твои́ми сподо́бит нас непреткнове́нно соверши́ти стра́нствие на́ше в сей юдо́ли пла́ча, в ми́ре и покая́нии сконча́ти живо́т наш, да та́ко во свя́тости на земли́ пожи́вше, ве́чныя блаже́нныя жи́зни на небеси́ сподо́бимся и та́мо с тобо́ю и все́ми святы́ми вку́пе восхва́лим Тро́ицу Неразде́льную и воспои́м Еди́но Божество́, Отца́ и Сы́на и Ду́ха Всесвята́го во ве́ки веко́в. Ами́нь.

Молитва иная

О свята́я мироно́сице, равноапо́стольная Магдали́но Мари́е! Ты те́плою любо́вию твое́ю ко Христу́ Бо́гу злы́я ко́зни вра́жия попра́ла еси́, и безце́нный би́сер Христа́ обре́тши, Ца́рства Небе́снаго дости́гла еси́. Сего́ ра́ди к тебе́ припа́даю умиле́нною душе́ю, и сокруше́нным се́рдцем вопию́ ти: при́зри с высоты́ небе́сныя на мя, грехо́вными искуше́ньми бори́маго: виждь, коль мно́гими грехи́ и беда́ми на всяк день враг мя запина́ет, поги́бели моея́ иски́й. Те́мже, о сла́вная и всехва́льная учени́це Христо́ва Мари́е, умоли́ возлю́бленнаго тобо́ю и возлюби́вшаго тя Христа́ Бо́га, да пода́ст ми оставле́ние мно́гих мои́х прегреше́ний, да укрепи́т мя благода́тию Свое́ю тре́звенно и бо́дренно ше́ствовати путе́м святы́х Его́ за́поведей и храм Ду́ха Свята́го мя да соде́лает: да та́ко многотру́дное житие́ мое́ на земли́ сконча́в, во све́тлыя и блаже́нныя оби́тели рая́ небе́снаго всели́тися сподо́блюся, иде́же ты со все́ми святы́ми ра́достно славосло́виши Единосу́щную Тро́ицу, Отца́ и Сы́на и Ду́ха Всесвята́го, во ве́ки веко́в. Ами́нь.

Конда́к 1

Возбра́нный Чудотво́рче и изря́дный уго́дниче Христо́в, ми́ру всему́ источа́яй многоце́нное ми́лости ми́ро и неисчерпа́емое чуде́с мо́ре, восхваля́ю тя́ любо́вию, святи́телю Нико́лае; ты́ же, я́ко име́яй дерзнове́ние ко Го́споду, от вся́ких мя́ бе́д свободи́, да зову́ ти́:

Ра́дуйся, Нико́лае, вели́кий Чудотво́рче.

И́кос 1

А́нгела о́бразом, земна́го су́ща естество́м, яви́ тебе́ всея́ тва́ри Созда́тель; благопло́дную бо добро́ту души́ твоея́ прови́дев, преблаже́нне Нико́лае, научи́ все́х вопи́ти тебе́ си́це:

Ра́дуйся, от утро́бы ма́терния очище́нный; ра́дуйся, да́же до конца́ освяще́нный.

Ра́дуйся, рожде́нием свои́м роди́телей удиви́вый; ра́дуйся, си́лу душе́вную а́бие по рождестве́ яви́вый.

Ра́дуйся, са́де земли́ обетова́ния; ра́дуйся, цве́те Боже́ственнаго сажде́ния.

Ра́дуйся, лозо́ доброде́тельная виногра́да Христо́ва; ра́дуйся, дре́во чудото́чное рая́ Иису́сова.

Ра́дуйся, кри́не ра́йскаго прозябе́ния; ра́дуйся, ми́ро Христо́ва благоуха́ния.

Ра́дуйся, я́ко тобо́ю отго́нится рыда́ние; ра́дуйся, я́ко тобо́ю прино́сится ра́дование.

Ра́дуйся, Нико́лае, вели́кий Чудотво́рче.

Конда́к 2

Ви́дяще твои́х ми́р излия́ние, Богому́дре, просвеща́емся душа́ми и телесы́, ди́внаго тя́ мирото́чца живоно́сна, Нико́лае, разуме́юще: чудесы́ бо, я́ко вода́ми, благода́тию Бо́жиею излива́ющимися, напая́еши ве́рно вопию́щих Бо́гу: Аллилу́иа.

И́кос 2

Ра́зум неуразуме́нный вразумля́я о Святе́й Тро́ице, бы́л еси́ в Нике́и со святы́ми отцы́ побо́рник испове́дания правосла́вныя ве́ры: ра́вна бо Отцу́ Сы́на испове́дал еси́, соприсносу́щна и сопресто́льна, А́рия же безу́мнаго обличи́л еси́. Сего́ ра́ди ве́рнии научи́шася воспева́ти тебе́:

Ра́дуйся, вели́кий благоче́стия сто́лпе; ра́дуйся, ве́рных прибе́жища гра́де.

Ра́дуйся, тве́рдое Правосла́вия укрепле́ние; ра́дуйся, честно́е Пресвяты́я Тро́ицы носи́ло и похвале́ние.

Ра́дуйся, Отцу́ равноче́стна Сы́на пропове́давый; ра́дуйся, А́рия возбеси́вшагося от Собо́ра святы́х отгна́вый.

Ра́дуйся, о́тче, отце́в сла́вная красото́; ра́дуйся, все́х богому́дрых прему́драя добро́то.

Ра́дуйся, о́гненная словеса́ испуща́яй; ра́дуйся, до́бре ста́до свое́ наставля́яй.

Ра́дуйся, я́ко тобо́ю ве́ра утвержда́ется; ра́дуйся, я́ко тобо́ю е́ресь низлага́ется.

Ра́дуйся, Нико́лае, вели́кий Чудотво́рче.

Конда́к 3

Си́лою, да́нною ти́ свы́ше, слезу́ вся́ку отъя́л еси́ от лица́ лю́те стра́ждущих, богоно́се о́тче Нико́лае: а́лчущим бо яви́лся еси́ корми́тель, в пучи́не морсте́й су́щим изря́дный прави́тель, неду́гующим исцеле́ние и все́м вся́к помо́щник показа́лся еси́, вопию́щим Бо́гу: Аллилу́иа.

И́кос 3

Име́яше вои́стину, о́тче Нико́лае, с Небесе́ пе́снь тебе́ воспева́ема бы́ти, а не от земли́: ка́ко бо кто́ от челове́к возмо́жет твоея́ святы́ни вели́чия пропове́дати; но мы́, любо́вию твое́ю побежда́еми, вопие́м ти́ си́це:

Ра́дуйся, о́бразе а́гнцев и па́стырей; ра́дуйся, свято́е очисти́лище нра́вов.

Ра́дуйся, доброде́телей вели́ких вмести́лище; ра́дуйся, святы́ни чи́стое и честно́е жили́ще.

Ра́дуйся, свети́льниче всесве́тлый и вселюби́мый; ра́дуйся, све́те златоза́рный и непоро́чный.

Ра́дуйся, досто́йный А́нгелов собесе́дниче; ра́дуйся, до́брый челове́ков наста́вниче.

Ра́дуйся, пра́вило ве́ры благочести́выя; ра́дуйся, о́бразе кро́тости духо́вныя.

Ра́дуйся, я́ко тобо́ю от страсте́й теле́сных избавля́емся; ра́дуйся, я́ко тобо́ю сла́достей духо́вных исполня́емся.

Ра́дуйся, Нико́лае, вели́кий Чудотво́рче.

Конда́к 4

Бу́ря недоуме́ния смуща́ет ми́ у́м, ка́ко досто́йно е́сть пе́ти чудеса́ твоя́, блаже́нне Нико́лае; никто́же бо мо́жет я́ исчести́, а́ще бы и мно́ги язы́ки име́л и глаго́лати восхоте́л; но мы́ ди́вно Бо́гу, в тебе́ прославля́ющемуся, дерза́ем воспева́ти: Аллилу́иа.

И́кос 4

Слы́шаша, богому́дре Нико́лае, бли́жнии и да́льнии вели́чие чуде́с твои́х, я́ко по возду́ху ле́гкими благода́тными крила́ми навы́кл еси́ су́щих в беда́х предваря́ти, ско́ро от те́х избавля́я все́х, вопию́щих к тебе́ такова́я:

Ра́дуйся, избавле́ние от печа́ли; ра́дуйся, подая́ние благода́ти.

Ра́дуйся, неча́емых зо́л прогони́телю; ра́дуйся, жела́емых благи́х насади́телю.

Ра́дуйся, ско́рый уте́шителю в беде́ су́щих; ра́дуйся, стра́шный наказа́телю оби́дящих.

Ра́дуйся, чуде́с пучи́но, Бо́гом излия́нная; ра́дуйся, зако́на Христо́ва скрижа́ли, Бо́гом пи́санныя.

Ра́дуйся, кре́пкое па́дающих возведе́ние; ра́дуйся, пра́во стоя́щих утвержде́ние.

Ра́дуйся, я́ко тобо́ю вся́кая ле́сть обнажа́ется; ра́дуйся, я́ко тобо́ю вся́кая и́стина сбыва́ется.

Ра́дуйся, Нико́лае, вели́кий Чудотво́рче.

Конда́к 5

Боготе́чная звезда́ яви́лся еси́, наставля́я по мо́рю пла́вающих лю́те, и́мже сме́рть предстоя́ше вско́ре иногда́, а́ще не бы ты́ предста́л еси́ призыва́ющим тя́ в по́мощь, Чудотво́рче святы́й Нико́лае; уже́ бо не сты́дно бесо́м лета́ющим и погрузи́ти корабли́ хотя́щим запрети́в, отгна́л еси́ и́х, ве́рныя же научи́л еси́ спаса́ющему тобо́ю Бо́гу взыва́ти: Аллилу́иа.

И́кос 5

Ви́деша отрокови́цы, на бра́к скве́рный нищеты́ ра́ди угото́ванныя, вели́кое твое́ к ни́щим милосе́рдие, преблаже́нне о́тчеНико́лае, егда́ ста́рцу роди́телю и́х но́щию узельцы́ три́ зла́та тая́ся пода́л еси́, самаго́ со дще́рьми избавля́я от паде́ния грехо́внаго. Того́ ра́ди слы́шиши от все́х си́це:

Ра́дуйся, ми́лости превели́кия сокро́вище; ра́дуйся, промышле́ния о лю́дех прия́телище.

Ра́дуйся, пи́ще и отра́до к тебе́ прибега́ющих; ра́дуйся, хле́бе неснеда́емый а́лчущих.

Ра́дуйся, бога́тство, бе́дне живу́щим на земли́ Бо́гом да́нное; ра́дуйся, воздви́жение ско́рое убо́гих.

Ра́дуйся, бы́строе ни́щих услы́шание; ра́дуйся, скорбя́щих прия́тное попече́ние.

Ра́дуйся, трие́х де́в непоро́чный невести́телю; ра́дуйся, чистоты́ усе́рдный храни́телю.

Ра́дуйся, ненаде́жных наде́яние; ра́дуйся, всего́ ми́ра наслажде́ние.

Ра́дуйся, Нико́лае, вели́кий Чудотво́рче.

Конда́к 6

Пропове́дует ми́р ве́сь тебе́, преблаже́нне Нико́лае, ско́раго в беда́х засту́пника: я́ко мно́гажды во еди́ном часе́, по земли́ путеше́ствующим и по мо́рю пла́вающим, предваря́я, посо́бствуеши, ку́пно все́х от злы́х сохраня́я, вопию́щих к Бо́гу: Аллилу́иа.

И́кос 6

Возсия́л еси́ све́т живо́тный, избавле́ние нося́ воево́дам, непра́ведную сме́рть прия́ти иму́щим, тебе́, до́брый па́стырю Нико́лае, призыва́ющим, егда́ вско́ре я́влься во сне́ царе́ви, устраши́л еси́ его́, си́х же неврежде́нных отпусти́ти повеле́л еси́. Сего́ ра́ди с ни́ми ку́пно и мы́ благода́рственно вопие́м ти́:

Ра́дуйся, усе́рдно призыва́ющим тя́ помога́яй; ра́дуйся, от непра́веднаго убие́ния избавля́яй.

Ра́дуйся, от ле́стныя сохраня́яй клеветы́; ра́дуйся, непра́ведныя разруша́яй сове́ты.

Ра́дуйся, растерза́яй лжу́ я́ко паучи́ну; ра́дуйся, возноша́яй сла́вно и́стину.

Ра́дуйся, непови́нных от у́з разреше́ние; ра́дуйся, и мертвеце́в оживле́ние.

Ра́дуйся, прояви́телю пра́вды; ра́дуйся, помрачи́телю непра́вды.

Ра́дуйся, я́ко тобо́ю непови́ннии изба́влени от меча́; ра́дуйся, я́ко тобо́ю наслади́шася све́та.

Ра́дуйся, Нико́лае, вели́кий Чудотво́рче.

Конда́к 7

Хотя́ богоху́льное ерети́ческое отгна́ти злосмра́дие, ми́ро вои́стину благово́нное, та́инственное яви́лся еси́, Нико́лае: лю́ди мире́йския упа́сл еси́ и ве́сь ми́р свои́м благода́тным ми́ром испо́лнил еси́. И от на́с у́бо богоме́рзкое грехо́вное злосмра́дие отжени́, да благоприя́тно Бо́гу вопие́м: Аллилу́иа.

И́кос 7

Но́ваго тя́ Но́я, наста́вника ковче́га спаси́тельнаго разуме́ем, о́тче святы́й Нико́лае, бу́рю все́х лю́тых разгоня́ющаго направле́нием свои́м, тишину́ же Боже́ственную принося́щаго вопию́щим такова́я:

Ра́дуйся, обурева́емых ти́хое приста́нище; ра́дуйся, утопа́ющих изве́стное храни́лище.

Ра́дуйся, пла́вающих посреде́ пучи́н до́брый ко́рмчий; ра́дуйся, треволне́ния морска́я уставля́ющий.

Ра́дуйся, превожде́ние су́щих в ви́хрех; ра́дуйся, согре́яние су́щих во мра́зех.

Ра́дуйся, сия́ние, ско́рбный мра́к разгоня́ющее; ра́дуйся, свети́ло, вся́ концы́ земли́ просвеща́ющее.

Ра́дуйся, от бе́здны грехо́вныя челове́ки избавля́яй; ра́дуйся, в бе́здну а́дскую сатану́ вверга́яй.

Ра́дуйся, я́ко тобо́ю дерзнове́нно бе́здну милосе́рдия Бо́жия призыва́ем; ра́дуйся, я́ко тобо́ю от пото́па гне́ва изба́вльшеся, ми́р с Бо́гом обрета́ем.

Ра́дуйся, Нико́лае, вели́кий Чудотво́рче.

Конда́к 8

Стра́нное чу́до явля́ется притека́ющим к тебе́, блаже́нне Нико́лае, свяще́нная твоя́ це́рковь: в не́й бо и ма́лое моле́ние принося́ще, ве́лиих неду́гов прие́млем исцеле́ние, а́ще то́кмо по Бо́зе упова́ние на тя́ возложи́м, ве́рно вопию́ще: Аллилу́иа.

И́кос 8

Ве́сь еси́ все́м вои́стину помо́щник, богоно́се Нико́лае, и собра́л еси́ вку́пе вся́ прибега́ющия к тебе́, я́ко свободи́тель, пита́тель и вра́ч ско́рый все́м земны́м, на похвалу́ все́х подвиза́я вопи́ти к тебе́ си́це:

Ра́дуйся, вся́ких исцеле́ний исто́чниче; ра́дуйся, лю́те стра́ждущим помо́щниче.

Ра́дуйся, заре́, сия́ющая в нощи́ грехо́вней блужда́ющим; ра́дуйся, росо́ небото́чная в зно́и трудо́в су́щим.

Ра́дуйся, подава́яй тре́бующим благострое́ние; ра́дуйся, уготовля́яй прося́щим изоби́лие.

Ра́дуйся, мно́гажды проше́ние предваря́яй; ра́дуйся, ста́рым седи́нам си́лу обновля́яй.

Ра́дуйся, мно́гих заблу́ждших от пути́ и́стиннаго обличи́телю; ра́дуйся, та́ин Бо́жиих ве́рный служи́телю.

Ра́дуйся, я́ко тобо́ю за́висть попира́ем; ра́дуйся, я́ко тобо́ю благонра́вное житие́ исправля́ем.

Ра́дуйся, Нико́лае, вели́кий Чудотво́рче.

Конда́к 9

Вся́кия утоли́ боле́зни, вели́кий на́ш засту́пниче Нико́лае, растворя́я благода́тная врачева́ния, услажда́ющая ду́ши на́ша, сердца́ же веселя́щая все́х усе́рдно к по́мощи твое́й притека́ющих, Бо́гу же вопию́щих: Аллилу́иа.

И́кос 9

Вети́я суему́дренныя нечести́вых ви́дим тобо́ю посра́мленныя, богому́дре о́тче Нико́лае: А́рия бо ху́льника, разделя́юща Божество́, и Саве́ллиа, смеша́юща Святу́ю Тро́ицу, препре́л, на́с же во Правосла́вии укрепи́л еси́. Сего́ ра́ди вопие́м ти́ си́це:

Ра́дуйся, щи́те, защища́яй благоче́стие; ра́дуйся, мечу́, посеца́яй злоче́стие.

Ра́дуйся, учи́телю Боже́ственных веле́ний; ра́дуйся, губи́телю богопроти́вных уче́ний.

Ра́дуйся, ле́ствице, Бо́гом утвержде́нная, е́юже восхо́дим к Небеси́; ра́дуйся, покро́ве, Бо́гом зда́нный, и́мже покрыва́ются мно́зи.

Ра́дуйся, нему́дрых умудри́вый твои́ми словесы́; ра́дуйся, лени́вых подви́гнувый твои́ми нра́вы.

Ра́дуйся, све́тлосте за́поведей Бо́жиих неугаси́мая; ра́дуйся, луче́ оправда́ний Госпо́дних пресве́тлая.

Ра́дуйся, я́ко уче́нием твои́м сокруша́ются ерети́ческия главы́; ра́дуйся, я́ко тобо́ю ве́рнии сподобля́ются сла́вы.

Ра́дуйся, Нико́лае, вели́кий Чудотво́рче.

Конда́к 10

Спасти́ хотя́ ду́шу, пло́ть твою́ ду́хови покори́л еси́ вои́стину, о́тче на́ш Нико́лае: молча́ньми бо пре́жде и боре́ньми с по́мыслы, дея́нию богомы́слие приложи́л еси́, богомы́слием же ра́зум соверше́н стяжа́л еси́, и́мже дерзнове́нно с Бо́гом и А́нгелы бесе́довал еси́, всегда́ вопия́: Аллилу́иа.

И́кос 10

Стена́ еси́ похваля́ющим, преблаже́нне, чудеса́ твоя́ и все́м к заступле́нию твоему́ прибега́ющим; те́мже и на́с, в доброде́тели убо́гих, от нищеты́, напа́сти, неду́гов и ну́жд разли́чных свобожда́й, вопию́щих ти́ с любо́вию такова́я:

Ра́дуйся, от убо́жества ве́чнаго изыма́яй; ра́дуйся, бога́тство нетле́нное подава́яй.

Ра́дуйся, бра́шно неги́блющее а́лчущим пра́вды; ра́дуйся, питие́ неисчерпа́емое жа́ждущим жи́зни.

Ра́дуйся, от мяте́жа и бра́ни соблюда́яй; ра́дуйся, от у́з и плене́ния свобожда́яй.

Ра́дуйся, пресла́вный в беда́х засту́пниче; ра́дуйся, превели́кий в напа́стех защи́тниче.

Ра́дуйся, мно́гих от поги́бели исхи́тивый; ра́дуйся, безчи́сленных неврежде́нно сохрани́вый.

Ра́дуйся, я́ко тобо́ю лю́тыя сме́рти гре́шнии избега́ют; ра́дуйся, я́ко тобо́ю жи́знь ве́чную ка́ющиися получа́ют.

Ра́дуйся, Нико́лае, вели́кий Чудотво́рче.

Конда́к 11

Пе́ние Пресвяте́й Тро́ице па́че ины́х прине́сл еси́, преблаже́нне Нико́лае, умо́м, сло́вом и де́лом: мно́гим бо испыта́нием правове́рная повеле́ния уясни́л еси́, ве́рою, наде́ждою и любо́вию наставля́я на́с в Тро́ице Еди́ному Бо́гу воспева́ти: Аллилу́иа.

И́кос 11

Светоза́рную лучу́, во мра́це жития́ су́щим неугаси́мую, ви́дим тя́, Бо́гом избра́нне о́тче Нико́лае: с невеще́ственными бо а́нгельскими све́ты бесе́дуеши о несозда́нном Тро́ическом Све́те, ве́рных же ду́ши просвеща́еши, вопию́щих ти́ такова́я:

Ра́дуйся, озаре́ние Трисо́лнечнаго Све́та; ра́дуйся, денни́це незаходи́маго Со́лнца.

Ра́дуйся, свеще́, Боже́ственным пла́менем возжже́нная; ра́дуйся, я́ко угаси́л еси́ бесо́вский пла́мень нече́стия.

Ра́дуйся, све́тлое правове́рия пропове́дание; ра́дуйся, доброзра́чное све́та ева́нгельскаго сия́ние.

Ра́дуйся, мо́лние, е́реси пожига́ющая; ра́дуйся, гро́ме, устраша́ющий соблазня́ющия.

Ра́дуйся, и́стиннаго научи́телю ра́зума; ра́дуйся, та́инственнаго изъяви́телю ума́.

Ра́дуйся, я́ко тобо́ю попра́ся поклоне́ние тва́ри; ра́дуйся, я́ко тобо́ю научи́хомся  покланя́тися Творцу́ в Тро́ице.

Ра́дуйся, Нико́лае, вели́кий Чудотво́рче.

Конда́к 12

Благода́ть, да́нную ти́ от Бо́га, све́дущии, ра́дующеся твою́ па́мять пра́зднуем по до́лгу, пресла́вный о́тче Нико́лае, и к чу́дному заступле́нию твоему́ вседу́шно притека́ем; пресла́вных же твои́х дея́ний, я́ко песка́ морска́го и мно́жества зве́зднаго исчести́ не могу́ще, недоуме́нием объя́ти бы́вше, вопие́м к Бо́гу: Аллилу́иа.

И́кос 12

Пою́ще твоя́ чудеса́, восхваля́ем тя́, всехва́льне Нико́лае: в тебе́ бо Бо́г, в Тро́ице прославля́емый, ди́вно просла́вися. Но а́ще и попремно́гу соста́вленныя от души́ псалмы́ и пе́сни прино́сим ти́, Чудотво́рче святы́й, ничто́же твори́м ра́вно дарова́нию чуде́с твои́х, и́мже удивля́ющеся, вопие́м к тебе́ такова́я:

Ра́дуйся, Царя́ ца́рствующих и Го́спода госпо́дствующих служи́телю; ра́дуйся, служи́телей Его́ небе́сных сожи́телю.

Ра́дуйся, лю́дем ве́рным поможе́ние; ра́дуйся, ро́да христиа́нскаго возвыше́ние.

Ра́дуйся, побе́ды тезоимени́тый; ра́дуйся, венцено́сче наро́читый.

Ра́дуйся, все́х доброде́телей зерца́ло; ра́дуйся, все́х притека́ющих к тебе́ кре́пкое забра́ло.

Ра́дуйся, по Бо́зе и Богоро́дице, все́ на́ше упова́ние; ра́дуйся, теле́с на́ших здра́вие и ду́ш спасе́ние.

Ра́дуйся, я́ко тобо́ю от ве́чныя сме́рти свобожда́емся; ра́дуйся, я́ко тобо́ю безконе́чныя жи́зни сподобля́емся.

Ра́дуйся, Нико́лае, вели́кий Чудотво́рче.

Конда́к 13

О пресвяты́й и пречу́дный о́тче Нико́лае, утеше́ние все́х скорбя́щих, ны́нешнее на́ше приими́ приноше́ние и от гее́нны изба́витися на́м Го́спода умоли́ богоприя́тным твои́м хода́тайством, да с тобо́ю воспева́ем: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1

А́нгела о́бразом, земна́го су́ща естество́м, яви́ тебе́ всея́ тва́ри Созда́тель; благопло́дную бо добро́ту души́ твоея́ прови́дев, преблаже́нне Нико́лае, научи́ все́х вопи́ти тебе́ си́це:

Ра́дуйся, от утро́бы ма́терния очище́нный; ра́дуйся, да́же до конца́ освяще́нный.

Ра́дуйся, рожде́нием свои́м роди́телей удиви́вый; ра́дуйся, си́лу душе́вную а́бие по рождестве́ яви́вый.

Ра́дуйся, са́де земли́ обетова́ния; ра́дуйся, цве́те Боже́ственнаго сажде́ния.

Ра́дуйся, лозо́ доброде́тельная виногра́да Христо́ва; ра́дуйся, дре́во чудото́чное рая́ Иису́сова.

Ра́дуйся, кри́не ра́йскаго прозябе́ния; ра́дуйся, ми́ро Христо́ва благоуха́ния.

Ра́дуйся, я́ко тобо́ю отго́нится рыда́ние; ра́дуйся, я́ко тобо́ю прино́сится ра́дование.

Ра́дуйся, Нико́лае, вели́кий Чудотво́рче.

Конда́к 1

Возбра́нный Чудотво́рче и изря́дный уго́дничеХристо́в, ми́ру всему́ источа́яй многоце́нное ми́лости ми́ро и неисчерпа́емое чуде́с мо́ре, восхваля́ю тя́ любо́вию, святи́телю Нико́лае; ты́ же, я́ко име́яй дерзнове́ние ко Го́споду, от вся́ких мя́ бе́д свободи́, да зову́ ти́:

Ра́дуйся, Нико́лае, вели́кий Чудотво́рче.

Моли́тва пе́рвая

О всесвяты́й Нико́лае, уго́дниче преизря́дный Госпо́день, те́плый на́ш засту́пниче и везде́ в ско́рбех ско́рый помо́щниче! Помози́ ми́, гре́шному и уны́лому, в настоя́щем се́м житии́, умоли́ Го́спода Бо́га дарова́ти ми́ оставле́ние все́х мои́х грехо́в, ели́ко согреши́х от ю́ности моея́, во все́м житии́ мое́м, де́лом, сло́вом, помышле́нием и все́ми мои́ми чу́вствы; и во исхо́де души́ моея́ помози́ ми́, окая́нному, умоли́ Го́спода Бо́га, всея́ тва́ри Соде́теля, изба́вити мя́ возду́шных мыта́рств и ве́чнаго муче́ния: да всегда́ прославля́ю Отца́ и Сы́на и Свята́го Ду́ха, и твое́ ми́лостивное предста́тельство, ны́не и при́сно и во ве́ки веко́в. Ами́нь.

Моли́тва втора́я

О всеблаги́й о́тче Нико́лае, па́стырю и учи́телю все́х, ве́рою притека́ющих ко твоему́ заступле́нию и те́плою моли́твою тебе́ призыва́ющих! Ско́ро потщи́ся и изба́ви Христо́во ста́до от волко́в губя́щих е́; и вся́ку страну́ христиа́нскую огради́ и сохрани́ святы́ми твои́ми моли́твами от мирска́го мяте́жа, тру́са, наше́ствия иноплеме́нников и междоусо́бныя бра́ни, от гла́да, пото́па, огня́, меча́ и внеза́пныя сме́рти. И я́коже поми́ловал еси́ трие́х муже́й, в темни́це седя́щих, и изба́вил еси́ и́х от царе́ва гне́ва и посече́ния ме́чнаго, та́ко поми́луй и мене́, умо́м, сло́вом и де́лом во тме́ грехо́в су́ща, и изба́ви мя́ гне́ва Бо́жия и ве́чныя ка́зни. Я́ко да твои́м хода́тайством и по́мощию, Свои́м же милосе́рдием и благода́тию Христо́с Бо́г ти́хое и безгре́шное житие́ да́ст ми́ пожи́ти в ве́це се́м и изба́вит мя́ от шу́ияго стоя́ния, сподо́бит же десна́го со все́ми святы́ми во ве́ки веко́в. Ами́нь.